பொங்கிப் பெருகும் புனல் !

நம்ம நாட்டு நயாகரா கர்நாடகாவில் ஷிமோகா மாவட்டத்தில் உள்ள ஜோக் நீர்வீழ்ச்சி. இது மேற்கு தொடர்ச்சி மலையில் அமைந்துள்ளது. சுமார் 975 அடி உயரத்தில் இருந்து செங்குத்தாக விழும் சராவதி ஆறு ஆரவாரத்துடன் கொட்டும் அழகு நமது கண்களை இமைக்க மறந்திடும்.

 

இந்த அருவியில் ராஜா, ராணி, ரோரர் மற்றும் ராக்கட் என நான்கு வகை அருவிகள் அதன் விழும் தன்மையைப் பொறுத்து,  பெயரிடப்பட்டுள்ளன.

       

நீர்வீழ்ச்சியின் தலைப்பகுதியில் இருந்து எந்தப் பாறையின் மீது படாமல் செங்குத்தாக கீழே தரையில் விழும் அருவியின் பெயர் ராஜா.

  

இதற்கு அடுத்து விழும் அருவியின் பெயர் ரோரர். மற்ற அருவிகளை விட அதிக சத்தத்துடன் ஆர்ப்பரித்து விழுவதால் இந்தப் பெயர். இந்த அருவியில் விழும் நீர், பாறைகளில் பட்டுத் திரும்பி கீழே சத்தத்துடன் படு வேகமாக விழும். இந்த நீர்வீழ்ச்சியின் ஆர்ப்பரிப்பு அதிரும் வண்ணம் இருக்கும்.

         

அடுத்து இருப்பதற்கு ராக்கட் அருவி எனப் பெயர். ஒரு ராக்கட் மேலே எழும்பும் போது அதன் அடிப்பகுதி புகை மண்டலமாக காட்சி அளித்து, ராக்கட் மேலே மேலே போகும் போது எப்படி ஒரு கோடு போல் தெரிகிறதோ அது போல இந்த அருவியில் இருந்து விழும் தண்ணீரானது மேலே ஒரு கோடு போல குறுகலான இடத்தில் இருந்து கீழ் நோக்கி தரையில் விழும் போது பெரும் புகை மண்டலமாக காட்சி அளிக்கும்.

        

நான்காவதாக இருப்பது ராணி நீர் வீழ்ச்சி. ஒரு பெண்ணின் நளினமான நடையைப் போல் பாறைகளில் நிதானமாக வீழ்கிறது இந்த அருவி. எனவே இதனை ராணி நீர்வீழ்ச்சி என்ற பெயரில் அழைப்பர்.

         

 

மேற்கூறிய நான்கு அருவிகளிலும் விழும் தண்ணீர் கீழே பள்ளத்தில் விழுந்து வெளியேறுகிறது. இதன் ஆழத்தை யாராலும் காண முடியவில்லை. நீர்வீழ்ச்சியின் கீழே வரை இறங்கிச் செல்ல படிக்கட்டுகள் உண்டு. நீர்வீழ்ச்சியின் சாரல் உடலில் பட்டுத் தெரிக்க சுற்றிலும் உள்ள இயற்கை அன்னையின் அழகை ரசித்தபடி எச்சரிகையுடன் சென்று வரலாம். மைசூர் ஷிமோகாவில் இருந்து 100 கி.மீ தொலைவில் மேற்கு தொடர்ச்சி மலையில் இந்த நீர்வீழ்ச்சி அமைந்துள்ளது. ஜூலை முதல் அக்டோபர் வரை இங்கு சீசன் காலம். 

       

   

கன்னடத்தில் “ஜோகே” என்றால் எச்சரிக்கை எனப் பொருள்படும். கரணம் தப்பினால் மரணம் என்பது போல மிகுந்த எச்சரிக்கையுடன் இதனை ரசிக்க வேண்டும் என்பதால் இந்தப் பெயர் மருவி ஜோக் நீர் வீழ்ச்சி என்ற பெயர் வந்தது. இந்த  நீர் வீழ்ச்சிக்கு மேல் ஆற்றில் உள்ள அணையில் நீர் நிரம்பியவுடன் அணையைத் திறந்து விடும் போது அனைத்து நீர்வீழ்ச்சிகளிலும் நீர் ஆரவாரத்துடன் கொட்டும் சமயத்தில் இது கனடாவில் உள்ள நயாகராவைப் போலவே இருக்கும்.

     

கர்னாடக மாநிலத்தில் இது போன்ற வற்றாத (காவேரியுடன் சேர்த்து) பல ஆறுகள், அருவிகள் நீர்வீழ்ச்சி இருந்து என்ன பயன்? உள்ளம் தார் பாலைவனம் போல் வறண்டுபோய் அல்லவா இருக்கிறது.